Facebook上有個「西店Hi客」專頁，每次有人投稿都引來大量網民討論究竟係「店Hi」定「客西」。事實上「西客」仲來都唔係香港獨有，就連大家一致認為非常高質嘅日本人，亦一樣有西客，而且仲「西」到任天堂推出七大「西客條款」，假若客人觸犯，將有機會被拒絕提供維修服務。

根據日本媒體報導，任天堂於10月時更新咗維修服務嘅條款，當中新增七項「顧客騷擾」行為，包括威脅或恐嚇、侮辱或貶低人格、侵犯私隱、要求超出保障範圍的免費維修、無合理理由下要求員工謝罪或處分員工、長時間重覆要求同一服務以及於社交網站上誹謗或中傷員工，違者將有可能被拒絕提供維修服務嘅權利。

另外任天堂仲講到明，如果情況變得不受控，佢咃將會尋求相關部門介入，例如報警或搵律師等，以維護員工嘅權利。

報導一出，日本網民對於任天堂嘅「西客條款」都大加讚賞，有專家分析指出，大家之所以支持「西客條款」，係因為喺生活、工作上或多或少都遇過西客，能夠對於任天堂員工被騷擾產生同感，亦希望大企業開出先例後，其他企業能夠跟隨。

資料來源：nikkansports