繼上週外媒報導James Gunn上任DC電影主席，令原定會拍嘅《Wonder Woman 3》及《Man of Steel 2》都會中止開發後，外媒又陸續爆出DC電影目前嘅發展狀況。當中包括《Wonder Woman》系列導演Patty Jenkins與WB高層們關係迅速變差，以及原來仲有一部由Michael Keaton主演嘅《Batman》電影被腰斬。

《Wonder Woman 1984》圖片：IMDB

Patty Jenkins  圖片：Wikicommon

首先據《The Wrap》報導，Patty Jenkins上週的確曾經將《Wonder Woman 3》嘅大綱交畀華納電影主席兼CEO Michael De Luca及Pamela Abdy睇過，而當時兩位高層就以「方向唔啱」而退回大綱，並希望Patty Jenkins能夠提出另一個提案。結果Patty Jenkins強烈反對作出任何修改，並認為兩位高層「唔了解佢，唔了解角色、唔了解咩係角色弧光」，甚至開完會後將維基百科上嘅「角色弧光 (Character arc)」頁面傳畀Michael De Luca，直接諷刺佢根本就唔識。

另一邊廂，雖然James Gunn無份參與退回《Wonder Woman 3》大綱一事，但佢事後亦同意個大綱的確與佢想像中嘅DC電影未來發展有出入。而Patty Jenkins似乎就對James Gunn非常反感，消息人士指出，佢有特別強調唔想聽到James Gunn對於《Wonder Woman 3》嘅任何意見。

目前嘅情況係，WB以至James Gunn其實都無意中止《Wonder Woman 3》，只要Patty Jenkins有任何新諗法，佢哋都非常願意聽。但Patty Jenkins就企硬一字不改，如果要改佢就乾脆唔拍，轉而開發其他新項目。

Michelle Pfeiffer於《Batman Returns》中飾演貓女  圖片：IMDB

Michael Keaton 圖片：Wiki Commons

而美國電影記者Jeff Sneider，上週亦於個人Podcast節目中爆出更多DC電影內幕。據佢講，除咗深陷泥沼嘅《Wonder Woman 3》，以及《Man of Steel 2》之外，WB及James Gunn仲有意腰斬另外一部由Michael Keaton主演嘅《Batman》電影。

據佢講，呢部新《Batman》將係Michael Keaton 於1992年主演嘅《Batman Returns》嘅續集，故事會改編動畫《Batman Beyond》，而且除咗Michael Keaton之外，仲有意搵埋92年電影中嘅貓女Michelle Pfeiffer返黎，不過目前未知Michelle Pfeiffer是否曾經答應過回歸。

講起Michael Keaton，佢都可以話係近來DC電影亂局嘅最大受害者之一。除咗上面講緊《Batman》電影，DC原本仲計劃畀佢於《The Flash》及《Batgirl》中現身，並發展成串連DC電影嘅重要人物。但依家《Batman》電影冇咗，《Batgirl》早前亦已經冇埋，Michael Keaton嘅重要性明顯降低不少。如果預定明年上映嘅《The Flash》有咩冬瓜豆腐，Michael Keaton就會由「重要人物」變成「冇出現過」。

資料來源：The Wrap、The Hollywood Reporter