{ SKIP }
文:MenClub 魏文青  
POSTED ON 16 Dec 2022

遊日必去景點、近年大力進軍本港嘅日本「驚安の殿堂 (Donki)」,今早突然宣佈會更換吉祥物,大家熟悉嘅企鵝「Donpen」將會被新角色「ド情ちゃん」取代,而且係即日生效。結果引起日本網民熱烈反對,要求保留「Donpen」。群情洶湧之下,「Donki」社長吉田直樹宣佈會開緊急會議商討對策,並會於日本時間8點公佈結果。

據資料顯示,Donpen自1998年起就係Donki嘅官方吉祥物,有著相當完整嘅人物設定,例如資料顯示Donpen於南極出世但係於東京長大、身體嘅長闊高以及體重都係98cm/kg 等。同時Donpen嘅身影亦佈滿所有Donki分店,由店舖標誌到建築物外牆裝飾,再到店內價錢牌以至海報,通通都有Donpen個樣。而隨住Donki成為旅客遊日必到之處、Donki近年又大力開展如香港等海外市場,Donpen嘅形象就更加為人熟悉。

另一邊廂,「ド情ちゃん」就係全新亮相嘅吉祥物,名字中嘅「ド (Do)」明顯就係代表「Donki」、「情」其實就係Donki於2009年起創立嘅自家品牌「情熱價格」嘅簡稱,再加上佢個外型就係一個「ド」字加上「情熱價格」牌仔,相信Donki就係想力推自家品牌,所以先會更換吉祥物。

不過「棄用Donpen」嘅帖文一出,馬上就遭到日本網民大力反對,更有人發起「支持Donpen戰勝ド情ちゃん」嘅「競選活動」,群情相當洶湧。不過值得一讚嘅係,Donki社長吉田直樹好快就親自回覆留言,表示自己會詳細了解事情,隨後於下午宣佈了解大家嘅反應,目前正進行公司內部緊急會議,會於日本時間8點左右,於官方Twitter宣佈結果。反應之快、對民意之重視,絕對值得某啲人學習一下。

如果《John Wick 5》冇Keanu Reeves嘅話,仲能唔能夠吸引觀眾入場呢?
hobby
【影視】獅門影業確定製作《John Wick 5》 Keanu Reeves會否回歸仍然是謎
17 Mar 2025
Christopher Nolan嘅下一部大作《Odyssey》星光熠熠,單單係Matt Damon、Tom Holland、Anne Hathaway、Zendaya等演員名單就已經夠吸引大家入場。但除咗電影公佈嘅首張劇照確認Matt Damon會出演主角奧德修斯(Odysseu ...
hobby
【影視】Nolan《Odyssey》角色名單曝露 荷蘭仔、麥迪文演父子 Zendaya飾雅典娜
17 Mar 2025