網絡Meme圖主角、來自日本嘅柴犬「Kabosu」驚傳病危。日前Kabosu嘅主人於社交網站突然公佈，Kabosu出現嚴重健康問題，似乎已經到命懸一線嘅地步，呼籲網民為Kabosu集氣加油。好在經過幾日治療後，Kabosu情況似乎有所好轉。

在 Instagram 查看這則貼文

かぼすママ（@kabosumama）分享的貼文

Kabosu嘅主人「Kabosumama」日前突然於Twitter及IG公佈Kabosu病危嘅消息。據佢講，係去獸醫到抽血檢驗後，先得知情況原來咁嚴重，並指出過往有好多奇蹟發生於Kabosu身上，相信今次亦都會出現奇蹟。而於Twitter上嘅帖文上，就指出Kabosu處於「非常危險」嘅狀態，「但不會有事的，絕對不會有事，大家都會為你送上力量！謝謝大家。」

Kabosu主人於今日再次更新社交媒體，並進一步交待Kabosu目前嘅身體狀況。佢話Kabosu目前患有急性膽管炎及慢性淋巴性白血病，同時肝臟嘅情況亦非常差，並出現黃疸嘅病徵狀。不過目前有食緊抗生素，Kabosu亦有胃口食嘢同飲水。

在 Instagram 查看這則貼文

かぼすママ（@kabosumama）分享的貼文

上個月先過17歲生日嘅Kabosu，本來係一隻被棄養嘅柴犬女仔，現任主人將其領養後，為咗呼籲大家關注棄養動物議題，所以幫Kabosu影咗一輯相放上網，點知因為相中Kabosu個樣太有喜感，於是成為外國網民瘋傳嘅著名Meme圖，近年更成為虛擬貨幣狗狗幣嘅標誌，可以話係世界上最多人見過嘅柴犬。