隨住MCU第五階段首部大作《蟻俠與黃蜂女：量子狂熱》將於下月上映，官方今日公開最新預告及兩款海報。除咗見到蟻俠一家人同征服者康，漫畫著名反派「魔多客（MODOK）」亦首度現身！

從預告可見，蟻俠一家人因意外再次誤入量子領域，並與當地高科技神祕生物互動，期間遇上終極大反派征服者康。蟻俠為咗重回現實世界，決定同能夠改寫寫實、控制時間嘅征服者康「交換條件」，幫助對方達成某個目的，然而兩派最終反目成仇，蟻俠更打算同征服者康同歸於盡。另外，原著漫晝著名反派「魔多客（MODOK）」亦首度登場，似乎係同征服者康同一夥人。

「魔多客（MODOK）」

《蟻俠與黃蜂女：量子狂熱》由Peyton Reed回歸執導，Paul Rudd、Evangeline Lilly、Michael Douglas、Michelle Pfeiffer等人全數回歸，而Kathryn Newton則飾演成年版Scott Lang女兒Cassie Lang。另外，今次亦係《蟻人》系列最「長」嘅一集，片長比前兩部多出7-8分鐘，總片長為125分鐘，2月15日於香港正式上映。