相信大家細個時都一定被父母限制過打機時間，而一般小朋友嘅反抗方法，無非就係襯老豆老母唔喺屋企時偷偷打。但日本一個11歲嘅小學生「石井亮丞」就決定用一個非常文明、成熟嘅方法黎表示自己嘅反對：佢用真名向日本《每日新聞》投稿，質疑家長限制小朋友打機嘅合理性。

圖片：Pakutaso

石井亮丞小朋友早前向日本《每日新聞》投稿一篇名為《為甚麼要限制打機時間 (ゲームの時間制限はなぜ) 》嘅文章。文中提到，佢早排因為打得太多機而被媽媽沒收咗部遊戲機，雖然媽媽事後有將遊戲機還畀佢，但就限制佢每日只可以打兩個鐘。而石井小朋友就質疑，如果係睇書或者散步，做幾耐都唔會有人覺得有問題；但如果係打機，就算佢向媽媽提出打三個鐘都會被拒絕。所以點解大家對於「打機」要差別對待？

佢亦提到，父母都同佢講要好好讀書先可以有好嘅將來，但「我不認為只有讀書才對未來有幫助。例如如果運動神經唔好或者唔鍾意音樂，一樣都係做唔到足球選手或者音樂家」。佢提出，其實打機都可以學到嘢，例如學習解開謎題、觀察故事等，對成長一樣有所幫助。

圖片：Pixabay

由於石井亮丞小朋友係用真名投稿，而且文章立論清晰，所以唔少日本網民睇到文章後都大讚石井亮丞係個有想法嘅小朋友。亦有人提醒，如果石井亮丞嘅父母睇到呢篇文章嘅話，一定要好好同石井小朋友溝通，畢竟佢細細個就已經咁有想法，如果繼續限制的話可能會適得其反。唔知大家又點睇小朋友打機呢回事呢？

資料來源：每日新聞