著名而神秘嘅英國街頭藝術家Banksy，昨日情人節時於IG公開其最新作品「Valentine's Day macara」，以表達對於家庭暴力嘅關注。不過其作品公開後僅幾小時，就已經被當地政府移除，但面對民眾批評，當地政府隨後又改口話只係要做安全檢查，會儘快還原作品。

在 Instagram 查看這則貼文

Banksy（@banksy）分享的貼文

卻說Banksy昨日於IG公開其最新作品。作品位於英國東南部小鎮Margate，描繪咗一名身穿50年代傳統家庭主婦裝束、右眼被打疼的女性，將一名男性放入一個躺平嘅雪櫃之中，而個雪櫃就係一個真正被遺棄於該地點嘅實物黎。考慮到作品中婦女嘅形象、傷勢，被放於雪櫃嘅男子，以及作品名字《Valentine's Day mascara》明顯係參照1920年代美國禁酒時期發生嘅黑幫槍擊事件「Valentine's Day massacre (情人節大屠殺)」，可以推斷作品係想表達對於家庭暴力嘅關注。

圖片：Sky News

不過Banksy發文後僅幾個小時，Margate當地政府就已經火速將個處於公共土地上嘅廢棄雪櫃移除，令作品中得返一對男人腳飄浮於半空，而之所以冇成幅作品塗掉，係因為嗰埲牆屬於私人財產，政府無權干預。而該間房屋嘅擁有者就對媒體表示，對於政府破壞作品感到相對失望，「(Banksy黎創作) 佢哋應該感到開心，因為Margate就有個旅遊景點。邊有人會整走佢咁戇居架？」

而Margate政府及後就向《The Independent》發文，表示佢哋係因為安全理由而搬走咗個雪櫃，而如果檢查過後證實個雪櫃冇危險，佢哋就會歸還個雪櫃，並與屋主商量如何保存作品。

資料來源：Independent、Sky News