如果大家有返咁上下年紀，或者會記得好多年前，香港淫審署曾經將來港展出、意大利文藝復興大師米高安哲羅嘅經典作品「大衛像」評為二級不雅，最後件事鬧到上最高法院，法官判詞指「任何有理智者都不會將大衛像視為不雅」。而近日美國校園竟然又發生一件頗為類似嘅事。佛羅里達州一間學校，因為向六年級學生展示大衛像嘅圖片，最後校長要被逼辭職。

圖片：Wikicommon

圖片：Galleria dell'Accademia

據報，佛羅里達州Tallahassee 學校嘅校長Hope Carrasquilla，早前向該校嘅六年級生介紹經典美術品時，曾展示一張大衛像嘅照片，隨後就收到數名家長向校董會投訴，而校董會就決定讓Hope Carrasquilla「選擇」自行辭職或被炒魷魚，最終Hope Carrasquilla選擇自行離職。

而據Hope Carrasquilla接受傳媒訪問時指，該校嘅教學守則有寫明，向學生展示如大衛像一樣「有爭議」嘅藝術品之前，要先向家長們寄出通知書，不過當時就因為「一系列溝通錯誤」，導致沒有發出通知書，所以嚴格黎講佢嘅「罪名」係「違反教學守則」。不過，佢亦提到至少有一位家長係「非常不滿」，「佢認為佢嘅小朋友唔應該睇到呢類圖片。」

而校董會主席Barney Bishop接受訪問時就指出，大衛像事件只係Hope Carrasquilla「其中一個問題」，但就以法律建議為由拒絕提供「其他問題」嘅詳情。同時佢亦表示「家長權益勝於一切，而佢哋唔鍾意目前嘅『覺醒文化灌輸』趨勢。」

Inviterò personalmente l’insegnante a Firenze per darle un riconoscimento a nome della città. L’arte è civiltà e chi la insegna merita rispetto.

— Dario Nardella (@DarioNardella) March 25, 2023

事件曝光後，就如同當年大衛像被香港淫審署評為不雅後一樣，引起大眾譁然。而有趣嘅係，常年展出大衛像嘅意大利佛羅倫斯學院美術館，主動邀請Tallahassee學校嘅師生家長前往意大利親眼欣賞大衛像；而佛羅倫斯市長Dario Nardella亦於Twitter公開表示，會邀請被炒嘅Hope Carrasquilla前往佛羅倫斯頒個獎過佢，因為「藝術是文明，而教授藝術的人值得被尊重。」