縱然近年憑《John Wick》系列成為荷里活最紅動作男星，但相信大家應該記得Keanu Reeves曾經有一段悲慘過往，甚至成個人都自帶「毒/獨」氣息。不過近日佢接受美國《People》雜誌訪問時，就罕有地提到與女友生活嘅美好時光，相信睇到嘅人都會覺得非常安慰。

卻說Keanu Reeves早前接受《People》嘅「最近一次」訪問，其中就被問到佢最近一次嘅「幸福時刻 (moment of bliss)」係幾時，而Keanu Reeves就回答：「幾日之前，我同親愛的 (honey) 一齊。我哋一齊喺床上，大家有所連結。我哋微笑、大笑、傻笑，感覺非常好。喺埋一齊嘅時間通常都好好。」

Keanu Reeves提到嘅「親愛的」，應該就係2019年時與佢手拖手出席洛杉磯郡立美術館 (LACMA) Art+電影節嘅藝術家兼慈善家Alexandra Grant。而《John Wick 4》演員之一Rina Sawayama亦曾於訪問中表示，Keanu及Alexandra係非常「甜蜜」、「溫暖」而且「貼地」，並形容佢哋為「美妙嘅一對」。

不過《People》訪問中，Keanu Reeves都透出些少「悲慘」氣氛。其中佢被問到「最近一次重覆嘅夢」時，佢就回答：「我有好幾個重覆發嘅惡夢，但佢哋實在太得人驚所以我就唔講啦。」而佢亦透露最近去咗次日本京都，「我去到京都然後有Jet lag，所以就去咗睇日出。日出永遠都咁好睇，你真係會停下來然後諗：能夠身處呢個地方真係好慶幸。」

資料來源：People