自從Johnny Depp與Amber Heard世紀官司正式落幕後，兩人演藝事業發生翻天覆地變化，一洗污名嘅Johnny Depp正式回歸影壇，嚟緊仲會執導意大利國寶級藝術家Amedeo Modigliani傳記電影，相反Amber Heard形象則一落千丈，更有傳佢喺《水行俠2》嘅戲份將會完全刪光。不過，華納兄弟日前於CinemaCon上播出嘅預告就證實Amber Heard成功保住戲份！

綜合外媒報導，本周舉行嘅CinemaCon 2023會上，華納兄弟播出《水行俠2》最新預告，除咗見到Jason Momoa飾演嘅Aquaman已成為亞特蘭提斯國王，Amber Heard所飾演嘅Mera公主亦有現身，但只有短短幾秒鐘水下戰鬥鏡頭，而且一句對白都冇，造型亦從上集嘅綠色緊身裝變成白色。至於Amber Heard實際上會有幾多戲份，就要等到電影正式上映先揭曉。《水行俠2》預計今年12月20日上映。