適逢日本兒童節（5月5日），專為御宅族提供婚姻諮詢服務嘅ToraCon發起問卷調查，邀請約1,700名年齡介乎20至49歲未婚網民，投選出「最想成為自己仔女」嘅動漫角色。第一名毫無懸念由《SPY×FAMILY》安妮亞奪得！大家心目中嘅小朋友有冇上榜呢？

第一名：《SPY×FAMILY》安妮亞

識得讀心術又活潑可愛嘅安妮亞深受一眾男士及女士喜愛，毫無懸念成為今次投票冠軍。其中有網民更表示：「佢能夠令你意識到小朋友原來係咁可愛！」

第二名：《鬼滅之刃》竈門炭治郎

自細就幫屋企賣炭為生，並照顧一大班細佬妹嘅炭治郎亦相當受歡迎，處處為家人著想、富有同情心又永不言敗嘅性格係唔少人心目中完美哥哥嘅代表。

第三名：《多啦A夢》出木杉英才 &《鋼之鍊金術師》愛德華·艾力克

為人父母都希望望子成龍、望女成鳳，聰明又謙虛嘅高材生出木杉自然係唔少人都想擁有嘅小朋友。而愛德華，為換回弟弟性命不惜失去右手，勇於守護同伴嘅性格亦備受欣賞。

綜合以上結果，日本網民似乎都希望自己嘅小朋友能夠擁有「顧家」、「善良」、「堅毅不屈」等特質，唔知大家又覺得咩特質先係最重要呢？