自從2020年Michael Jordan嘅紀錄片《The Last Dance》播映後，「二佬」Pippen就因為紀錄片中將佢描繪為「配角」而感到不滿，更多次公開批評Jordan嘅為人及球技。近日佢登上另一位前公牛球員、91至93賽季三冠王成員之一Stacey King嘅Podcast時，又再次嘲諷Jordan係「糟糕的球員、糟糕的隊友」。

卻說Pippen日前登上Stacey King嘅Podcast節目《Gimme The Hot Sauce》，當中除咗傾到佢對於《The Last Dance》嘅不滿之外，佢哋亦提到Pippen心目中歷來最好嘅球員，(唔計佢自己嘅話佢揀咗Lebron James、Michael Jordan、Magic Johnson、Kareem Abdul-Jabbar同Carl Malone)。而Stacey King就順理成章地追問：「好多人覺得Jordan係最偉大球員，你覺得呢？」

Pippen就表示，佢對於「偉大 (Greatest)」嘅定義有啲唔同，佢認為其他人因為Michael Jordan拎咗好多MVP所以被視為「偉大」，但另一邊廂目前效力丹佛金塊嘅Jukic連續拎咗兩年MVP都冇人話佢係「偉大」，所以「我唔_想再聽到有人提起啲咩最偉大球員，除非佢贏到波」。而於呢個前題下，佢就表示Lebron James「好可能係史上最偉大『贏家』之一」，亦有可能係「史上數據最偉大嘅球員」，但對於Lebron是否「史上最偉大球員」，佢就表示「我畀大家自行討論」，因為「籃球係團體合作，冇球員可以一個人搞掂。」

《The Last Dance》

然後佢就話鋒一轉，轉向批評Jordan，「我加盟公牛前有睇過Jordan嘅打法，你哋都有睇過，佢係個好差嘅球員、好差嘅隊友，佢成日都單打，又亂射，係突然間我哋黎到、開始贏波，大家就唔記得佢以前係點。贏波唔係佢最想做到嘅嘢，佢想要嘅係得分，佢想要嘅係得分類嘅銜頭。直到Phil Jackson黎到，先令佢有些少改變，都仲要搞一輪先改到——而呢Part好明顯就唔喺套紀錄片入面啦！」

講到尾，Pippen近年嘅論點，都係唔否認Michael Jordan有其過人之處，但就不滿佢於《The Last Dance》中將當年公牛王朝嘅功勞都攬哂上身，將其他隊友當係配角、綠葉。