無可否認，Marvel電影係近十年最令吸引人入場嘅電影之一，但過往多位大牌導演都曾公開批評Marvel電影。例如Martin Scorsese就曾經於《New York Times》撰文表示「Marvel電影唔係電影，係主題樂園」、 Quentin Tarantino亦曾「指Marvel電影中嘅演員唔係巨星，啲角色(英雄)先係」。而近日Chris Hemsworth接受《GQ》雜誌訪問時，就正面回應兩位導演嘅批評，佢甚至直言《Thor 4》的確係有啲太低B (Silly)。

圖片：New York Times

對於兩位導演嘅批評，Chris Hemsworth表示：「我聽到真係勁唔開心，睇黎我兩位呢位英雄應該唔會同我合作啦，我估佢哋唔係我嘅Fans。」佢亦表示，好感恩可以參與一個令大家繼續去戲院睇戲嘅系列，「但你話呢啲戲係咪損害緊其他人嘅利益呢？我就唔知。當成個行業都咁脆弱嘅時候，我就唔太鍾意互相攻擊——我唔係講緊兩位導演，佢哋永遠都係我嘅英雄，而如果佢哋叫到嘅話我隨時仆去同佢哋合作——我係講緊大家對呢個話題嘅意見。」

佢亦坦承，目前佢主演嘅最後一部Marvel電影 《Thor: Love and Thunder (Thor 4)》口碑麻麻，就連佢個8歲仔嘅同齡朋友都會喺佢面前直接批評「『我哋覺得呢套太多搞笑位，動作場面係幾有型但啲特效就差啲囉』，聽到我好笑又好尷尬。但我都覺得套戲真係太用力搞笑，就變得有啲低B (silly)。拍緊嘅時候你係好難會知道，而我亦好鍾意個拍攝過程，但你真係唔會知出到黎啲人會係咩反應。」

資料來源：GQ