上週上映嘅DC電影新作《The Flash》，無論係事前嘅傳媒評論，定上映後嘅觀眾評價都相當唔錯，甚至有人認為電影會係DC「撥亂返正」之作，不過票房數據似乎就唔係咁睇。日前《The Flash》嘅首週票房出爐，不單止比預期要差，甚至比起去年上映嘅《Black Adam》都更差，所以有傳媒估計《The Flash》最後都要蝕錢，而且蝕到入肉。

圖片：IMDB

圖片：Movie Mojo

《The Flash》上映後獲得各界支持，除咗現任DC電影掌舵人James Gunn、Warner Bros. Discovery CEO David Zaslav等「自己人」外，就連Tom Cruise早前偷步睇完後都大為讚賞，仲親自打畀電影導演Andy Muchietti讚道：「呢部就係我哋依家需要嘅電影。」另一方面，《The Flash》上映後嘅觀眾評價亦相當唔錯，目前Rotten Tomatoes上嘅觀眾新鮮度有85% (《Black Adam》有88%)。

不過電影嘅首週票房就相當令人失望，北美市場只得5500萬美金，就算計埋週一票房都只係6400萬美金左右，而海外票房就有7500萬美金，換言首週全球票房僅為1.4億美金左右。

圖片：IMDB

圖片：Movie Mojo

外媒《Collider》就仔細分析咗《The Flash》嘅成本與收入。據佢哋估計，《The Flash》嘅製作成本大約為2億美金，而全球宣傳費就至少為6500萬美金，換言之電影要回本，保守估計全球總票房要有2.65億美金，穩陣啲嘅估計更要4億美金。

而目前《The Flash》首週收1.4億左右似乎唔少，但電影上映首週通常都係最賺錢嘅時段，往後票房就會大幅下滑，換言之個頭開得唔好，總票房通常都唔會高。好似成本同樣為2億美金嘅《Black Adam》，首週北美票房有6700萬美金，最終全球票房不足4億，坊間普遍認為係蝕錢 (雖然Dwayne Johnson唔認)。而《The Flash》首週票房比《Black Adam》更差，總票房自然就可能更差，亦即Warner Bros. 會蝕得再甘啲。

資料來源：Collider