講起「灣岸」，相對大部份香港人都會諗起當年吒叱咤機鋪嘅賽車機台，不過同另一賽車機台「頭D」一樣，「灣岸」其實都係改篇自漫畫《灣岸Midnight》，而且更由1990年起連載咗18年之久。近日日本就有廠商以作品嘅主角車、號稱「惡魔之Z」嘅日產Fairlady 240Z (即S30)為藍本，推出一隻無線滑鼠，擁有Fairlady唔係夢啦！

於漫畫中，主角朝倉明雄本來係駕駛一部Fairlady Z31，但後來無意中遇到一部過往意外不斷、但通通都係車無事、人就重傷或死嘅「惡魔之Z」S30，於是就賣咗架Z31換成S30。後來朝倉明雄駕駛S30時真係遇上意外，不過今次就係人無事、車全毀，有感架車係為咗教佢而犧牲自己，所以明雄用盡辦法將車整好，最後成為東京灣岸線上嘅「最快惡魔」。

而呢隻無線滑鼠，就係跟足朝倉明雄部S30黎設計。作為一隻滑鼠黎講應該手感奇差，但由於搵黎日產監修，所以作為一部S30黎講應該非常像真，而且車頭燈真係識著，仲送埋以《灣岸Midnight》漫畫第一期封面設計嘅滑鼠墊。

值得一提嘅係，同廠過往仲出過《頭文字D》中嘅「AE86」，又或者日產Skyline 2000GT等名車滑鼠，通通都係賣6,600Yen (約HK$360)，大家有興趣可以去睇下。

資料來源：Camshop