經典冒險電影《奪寶奇兵》系列第五集《奪寶奇兵：命運輪盤》上周四正式上映，Harrison Ford「最後一次」回歸飾演考古學家鍾斯博士，再度手執皮鞭展開驚險刺激奪寶之旅。然而，電影於北美首周票房僅收7,000萬美元、海外票房則收3,300萬美元，全球票房合共約1.3億美元，比起叫好但不叫座嘅《閃電俠》首周票房1.39億美元更低，甚至比15年前嘅第四集《奪寶奇兵之水晶骷髏國》1.42億美元更差。

據了解，《命運輪盤》製作成本高達2.95億美元，為系列中最貴嘅一部，若然要達到收支平衡，全球票房至少要達到6億美元，考慮到嚟緊仲有《不可能的任務：致命清算 第一章》以及《奧本海默》等大作即將上映，要回本確實有難道。不過，又唔係完全冇希望嘅，例如當年嘅《007：生死有時》及《職業特工隊：叛逆之謎》北美首周票房都係得6,000萬美元左右，但最終於全球斬獲近8億美元票房。

《奪寶奇兵：命運輪盤》由《Logan（盧根）》導演James Mangold接棒執導，而執導過前四部嘅Steven Spielberg（史提芬·史匹堡）則退居監製。故事背景設定於上世紀60年代，即將退休嘅鍾斯博士因為契女Helena（Phoebe Waller-Bridge 飾）嘅出現而捲入一場奪寶之旅，共同對抗一眾前納粹黨成員。