近年Netflix大力投資韓國劇集及電影，而且成績相當出色，例如《魷魚遊戲》就係Netflix史上最受歡迎嘅劇集，亦令唔少韓國演員成為國際知名影星，睇落就似乎係個「雙贏」局面。但據外媒報導，其實韓國韓演員工會一直要求就演員薪酬以及AI使用等議題，與Netflix進行談判，但Netflix方面就一直無視對方，情況與近來嘅荷里活罷工如出一轍。

據《Los Angeles Times》報導，雖然Netflix進入韓國韓演藝市場，的確為當地幕前幕後人士帶來大量工作機會，更將韓國嘅人材推廣到世界層面，表面上係一件好事。但Netflix透過韓劇賺到大把鈔票嘅同時，就冇將收入回饋於韓國業界。

韓國韓演員工會主席Song Chang-gon接受訪問時表示，雖然Netflix韓劇嘅主角們能夠獲得一集40萬美金嘅超高薪，與荷里活一線劇集主角們持平，但配角及普通演員就只能獲得每集300美金嘅酬勞。而且Netflix劇集嘅集數比一般韓劇更少，但每集嘅拍攝時間就比一般韓劇長，OT仲要唔補水，所以換成時薪後就遠低於市場水平。

關於收入嘅另一重點，就係劇集分成問題。與荷里活相同，傳統韓國電視台會於劇集重播時，向演員支付額外酬勞。但Netlix於韓國多以外判形式製作節目，所以能夠以自己係「串流平台」而非「電視台/製作公司」為由，避開埋當地嘅勞工法例規管。

另外AI問題亦係韓國工會關注嘅重點。例如由金宇杉主演嘅科幻韓國《末日騎士》中，劇組就為十名主要演員製作3D掃瞄電子替身，本意雖然係為咗令演員「親身出演」危險嘅動作場面，但同時亦為「用AI取代真人演員/替身演員」開下先河。而韓國配音員嘅情況就更加嚴峻，事關當地並無任何法例或工會條款，禁止持有錄音嘅片商利用AI技術進行「再加工」，所以片商絕對可以利用配音員嘅舊作，生成「AI聲音」取代真人。

更令工會擔心嘅係，Netflix於當地幾乎無留下任何聯絡方法，就算工會想搵人傾都唔知搵邊個。Song Chang-gon曾經托人拎到韓國Netflix高層嘅私人電話，但從來無得到任何回覆。

資料來源：Los Angeles Times