改編自日本漫畫家野田サトル同名作品嘅《黃金神威》 真人版電影，今日正式公布演員名單及前導預告，其中山崎賢人將扮演主角「杉元佐一」，而「阿席莉帕」則由山田杏奈飾演，並非之前盛傳嘅橋本環奈。

《黃金神威》以日俄戰爭後嘅北海道為背景，講述前陸軍第一師團士兵，被稱為「不死身」嘅「杉元佐一」退役後為完成陣亡戰友遺願，獨自前往北海道淘金，期間遇上當地土著「愛奴族」少女「阿席莉帕」，從而捲入一場價值8億日圓嘅黃金劫案。故事融合明治末期北海道嘅史地文化、冒險尋寶、生存、烹調等元素，同時又有激烈戰鬥及搞笑情節，吸引唔少動漫迷喜愛。

除咗兩位主演，其餘卡司包括眞栄田郷敦⁡（飾 尾形百之助）、矢本悠馬⁡（飾 白石由竹）、工藤阿須加⁡（飾 月島基）、玉木宏⁡（飾 鶴見篤四郎）、館博（飾 土方歳三）、柳俊太郎（飾 二階堂浩平/洋平）、大谷亮平⁡（飾 谷垣源次郎）、勝矢⁡（飾 牛山辰馬）、木場勝己（飾 永倉新八）、大方斐紗子⁡（飾 阿席莉帕的祖母）、槙田雄司（飾 後藤竹千代）以及秋辺デボ（飾 阿席莉帕的叔叔）等等，預計2024年1月19日於日本正式上映。