隨住環保意識抬頭，近年全球多國相繼定下「停售燃油車」目標，傳統車廠亦紛紛投入研發電動車。然而，目前仍然有唔少人堅持購買及駕駛燃油車，除咗係因為車價較低、續航力更高、維修資源較多等原因，更可能同「男子氣概」有關。

據外媒《Daily Mail》報導，近日德州大學奧斯汀分校Michael Parent博士進行一項研究，探討男子氣概偶然性（masculinity contingency），以及其如何消費者行為及生活方式，並訪問咗400位美國男性，當被問到會選擇汽油、柴油、油電混合定係電動車時，有近40%人都將電動車視為最差選擇，主要原因係認為駕駛電動車有損男子氣概。

對此，心理學家Louise Goddard-Crawley表示，傳統汽車引擎聲及強大性能等特質同男子氣概息息相關，而電動車較為寧靜，導致對傳統性別規範有強烈認同嘅消費者產生抗拒。

Elon Musk揸Cybertruck又夠唔夠男子氣概？

值得一提嘅係，受訪者只係就假設性問題作出回答，唔排除真係買車嗰陣會講一套做一套，而Michael Parent亦表明目前未確實數據支持，並認為廠商可以透過廣告嚟改善電動車唔夠Man嘅既定印象。