所有男仔細個都會睇機械人動畫，而除咗《高達》系列之外，同樣由日昇推出嘅《勇者》系列亦係大家嘅童年回憶之一。而唔覺唔覺，《勇者》系列原來都已經播出超過30年，其中系列第四部作品《勇者特急》就於今年迎來30週年。而SEIKO近日就宣佈會為《勇者特急》推出限定300隻嘅30週年紀念腕錶！

《勇者特急》最早於1993年1月開始於日本播出，而香港就係1997年11月開始播放。故事講述因石油枯竭，未來世界改以電氣化鐵路為主要交通工具，而主角「旋風寺舞人」就繼承爸爸留底嘅超大型企業，加上能由火車變成合體成大型機械人嘅「勇者特急隊」對抗惡勢力。而機械人主角就係由新幹線300型變身而成嘅「凱因」，但相信大家應該對入面部藍金配色、合體後會成為心口部份嘅蒸氣火車頭「機關提升車 (ロコモライザー)」更有印象。

而今次SEIKO推出嘅30週年紀念腕錶，主要靈感都係來自「機關提升車 (ロコモライザー)」個車頭。其中錶圈、拍針、時標、錶冠、計時按鈕、以及小錶圈與指針通通都用上亮金色，而12點位置就再現咗「檮關提升車」車頭上嘅紅燈。錶冠上則有代表「Might Gaine (即凱因)」嘅標誌，底蓋亦有《勇者特急》標誌以及「限定版」字樣。

紀念腕錶限定300隻，官方售價為59,400Yen，即約HK14,500左右。即日起至明年3月20日，於U-Treasure官網接受預訂，

資料來源：U-Treasure