《蒼鷺與少年》將於今年12月正式登陸香港，由於宮﨑駿年事已高，外界一直有傳今次將會係佢嘅收官之作。不過，最近吉卜力工作室就表示，宮崎老師根本冇打算退休，並構思緊全新作品...

《蒼鷺與少年》日前於多倫多影展舉行首映，雖然宮﨑駿未有親自到場，但吉卜力工作室派出副總裁西岡純一出席，當被問到《蒼》是否宮崎老師引退作時，西岡純一就笑住表示：「好多人都認為呢部係宮﨑駿最後一部電影，但佢本人完全唔係咁諗。佢目前正構思緊一部新電影，而且每日都會返辦公室進行創作。今次，佢唔打算宣布退休，而係會繼續創作。」

事實上，宮﨑駿從來都冇話過《蒼》係佢生涯最後一部作品，可能係因為佢之前曾多次宣布退休，加上已經82歲高齡，所以大家都誤以為今次又係收官之作。期待呢位動畫大師創作更多有趣作品！

資料來源：kotaku