面對開發成本上漲，遊戲開發商過去幾年一直放風想提高3A大作嘅售價。而自從去年2K Games率先宣佈由原本嘅59.99美金加價到69.99美金後，其他廠商亦紛紛仿傚，例如《God of War: Ragnarok》、《Hogwarts Legacy》等通通都賣69.99美金。但睇黎對部份遊戲廠商黎講，加十蚊美金依然不足以回收開發成本。好似近日就有網絡傳聞指Rockstars嘅《GTA 6》將會賣到150美金，即係近千二銀港紙！

話說本月初時有一堆關於《GTA 6》嘅「情報」於網上流出，而「情報」中就有指Rockstar會將《GTA 6》定價為150美金。據估計自2014年起，Rockstars用咗大約20億美金去開發《GTA 6》，比起其他近年嘅「普通3A大作」開發成本大約貴一倍，而比起5-6年前開發一隻3A大作「只需」1億至1.5億美金更貴咗十幾二十倍。

2021年5月，Rockstars母公司Take-Two曾表示《GTA V》嘅全球、全平台銷量達到1.45億套。就算用「原價」59.99美金去計，收入其實都只係87億美金左右。仲未計遊戲推出後多次減價，目前「正價」只需39.99美金，遇到優惠更可以平到9.99美金。換言之遊戲銷售總收入一定低過87億美金。咁睇黎《GTA 6》加價似乎亦非常合理。

要價300美金嘅《Starfield》Constellation Edition

值得留意嘅係，呢個「150美金」傳聞真係一個「傳聞」，目前冇任何其他文字、錄音證據能夠佐證，所以未能確定《GTA 6》是否會大幅加價。同時，「150美金一隻Game」其實亦唔係新鮮事，過往就有唔少遊戲出過附送各種週邊、福利嘅「豪華版」、「終極版」、「典藏版」，例如Bethesda推出嘅最新遊戲《Starfield》，就有個送智能手錶、精美手提行李箱、鋼製遊戲盒以及遊戲內福利嘅「Constellation Edition」要價300美金，但一眾Fans都買得非常開心。所以即使傳聞屬實，Rockstars內部亦可能只係講緊某個賣150美金嘅特別版本。

更重要嘅係，目前《GTA 6》未有正式推出日期，當然亦未公佈售價。所以一切都係等官方公佈後再討論啦。

資料來源：nichegamer