繼日前短短30秒嘅前導預告後，《水行俠與失落王國》終於喺今日公開正式預告，亞特蘭提斯之王正式回歸，而且仲多咗個身份！

從預告可見，「水行俠」Arthur如今已升格成人父，與Mera結婚育有一子，甚至做埋湊仔公幫阿仔換尿片，享受天倫之樂。但好景不常，首集反派「黑蝠魟」 Black Manta帶領大軍捲土重來誓要為父報仇，手持遠古神器暗黑三叉戟高喊：「我要殺死水行俠，摧毀他珍愛及重視的一切。我要殺死他的家人，將他的王國燒為灰燼。」為打敗呢位強大敵人，Arthur只好求助亞特蘭提斯前任國王、同母異父哥哥Orm，拋開成見合力拯救整個王國。

對於外界有傳Amber Heard因誹謗案敗訴而被大刪戲份，導演溫子仁日前接受《EW》訪問時就表示：「我一直以嚟都係咁樣向外界宣傳。第一部《水行俠》係講述Arthur同Mera嘅冒險愛情故事，而續集則係聚焦Arthur同Orm嘅兄弟情。」換言之Amber Heard嘅戲份會相對較少，從預告中亦可以見到Amber只得1秒鐘鏡頭，但實際上有幾少，就要等到上畫先知。《水行俠與失落王國》預計今年12月正式上映。