日本職棒球隊「阪神虎」日前奪得所屬中央聯盟冠軍，係球隊自2005年後時隔18年再次奪冠。賽後球迷「遵照傳統」前往道頓堀、心齋橋一帶結集，試圖跳入道頓堀慶祝，而其中來自共同通信社嘅記者「松嵜未来」就拍到以下呢張球迷飛身入河嘅照片，被日本網民稱為「奇蹟的一枚」！

18年ぶりのリーグ優勝が決まった瞬間、大阪の繁華街でもファンが喜びを爆発させました。大阪・ミナミ の道頓堀川に架かる戎橋一帯では「#六甲おろし」の合唱が繰り返され、厳重な警備をかいくぐって川に飛び込む人も。キタの駅周辺では号外に多くの人が群がりました。 pic.twitter.com/fQvGLv7Xkk

— 共同通信・大阪支社 (@kyodonewsosaka) September 14, 2023

「阪神虎」同道頓堀嘅淵源，來自1985年球隊首次勝出日本大賽成為「日本第一」後，大量球迷結集於道頓堀戎橋上瘋狂慶祝，期間有球迷高呼球員名字，然後就會有打扮成該名球員嘅球迷自願「跳河」慶祝，從此「跳道頓堀」就成為「阪神虎奪冠」後嘅球迷傳統。但因為2003年阪神虎奪得中央聯盟冠軍後，有超過5,300名球迷跳河慶祝，結果造成一人死亡，從此大阪警方就嚴防再有人跳河。今次奪冠後大阪警方亦派出超過1,300名警員於附近維持秩序，最終僅有數人突破封鎖成功跳河。

在此背景下，就睇得出記者「松嵜未来」影到嘅呢張相有幾難得。試想像記者於現場等足一晚，能夠及時發現有人突破封鎖、捕捉到佢身在半空全面仲展嘅英姿、仲要咁啱旁邊有位女子開閃光燈影相，令畫面更有層次，本身就係可遇不可求。

2009年被尋回大部份嘅「肯德基爺爺」，右手亦缺失，眼鏡並非原裝

圖片：Wikipedia

順帶一提，1985年球迷首次「跳河」時，由於球迷中無美國人，所以當叫到球隊奪冠MVP Randy Bass名字時，球迷就將附近一間KFC門口擺放嘅「肯德基爺爺」雕像掉咗落河，而球隊成績隨即一落千丈，連續十幾年成為聯盟墊底隊伍。於是坊間出現「肯德基爺爺詛咒」嘅都市傳說，指搵返個雕像上黎之前，阪神虎都唔能夠再成為「日本第一」。

多年黎球迷多次自發尋找肯德基爺爺雕像，但都無功而回，直到2009年有人陸續尋回肯德基爺爺嘅頭部以及上下半身，唯獨右手及眼鏡未能尋回。事實上阪神虎亦真係自1985年黎從未成功奪得日本第一稱號，頂到盡都只係中央聯盟冠軍 (日本第一係要同另一職棒聯盟太平洋聯盟爭)，所以仍有不少球迷相信，要搵返肯德基爺爺隻右手同眼鏡，先能夠破解詛咒。