CAPCOM社長認為目前遊戲格價太低，提升售價對行業嚟講一係個「健康的選擇」。

據《日經新聞》報導，CAPCOM社長辻本春弘日前於「2023東京電玩展」上表示：「現時遊戲開發成本比紅白機年代高出約100倍，但遊戲售價並未大幅上漲。加上行業工資水平愈嚟愈高，需要提高工資吸引人才，所以我認為提升遊戲價格對行業嚟講係一個健康的選擇。」另外辻本先生亦表示，佢認為現時嘅經濟環境對遊戲銷量影響唔大，正如經濟衰退都無阻人們去睇電影或睇演唱會，高品質遊戲依然會大賣，更以2008年雷曼兄弟破產為例子，指出當時經濟雖然唔好，但遊戲銷售表現依然唔錯。

無可否認，隨住電子遊戲變得愈嚟愈精美及複雜，需要更多員工、時間及資源製作，開發成本絕對比紅白機年代高出好多，但與此同時，電玩市場規模亦比當年龐大，現時嘅3A大作閒閒哋都能夠賣出破千萬份（紅白機年代破千萬銷量遊戲屈指可數），加上而家嘅廠商會將遊戲本體分拆成DLC販賣、推出付費道品以及推廣數位版遊戲增加收入及降低發行成本。因此，唔少玩家都質疑係咪真係有需要提升遊戲售價，以彌補開發成本及工資上升，其中有網友更語帶諷刺表示：「如果加價所賺到嘅錢，直接用作提高開發者人工，我咪願意埋單囉。」

順帶一提，雖然2K Sports、Sony、Activision、EA等大廠相繼將3A遊戲售價從以往嘅60美金提升至70美元，但CAPCOM並未跟隨，今年推出嘅《Resident Evil 4 Remake》同《Street Fighter 6》都仲係賣緊60美金，但第時嘅新GAME會唔會加價到70美金就不得而知喇。