經過多年發展，《Pokemon》已經唔係大家細個會玩嘅遊戲、會睇嘅卡通咁簡單，而係一個滲入各個界別嘅著名品牌。近日佢哋就踩埋入藝術界，與荷蘭梵高美術館合作舉行展覽，當中除咗有梵高風格嘅《Pokemon》畫作之外，仲有相關週邊以及特別版《Pokemon》卡！

今次聯乘其實梵高美術館50週年慶祝活動嘅一部份，除咗呼應梵高創作風格受到日本藝術影響之外，更希望透過《Pokemon》吸引新生代了解梵高嘅作品，以及「清新地」了解佢嘅一生。展覽會於9月28日至明年1月7日間舉行，展品包括《Pokemon》卡牌插畫家「木村直代」參照梵高名作《戴灰氈帽的自畫像 (Self-Portrait with Grey Felt Hat)》而創作嘅「比卡超自畫像」，以及另外五幅以同樣方式創作嘅插畫。

特別版卡牌

部份週邊

同時美術館亦會於展期內舉行特別活動，訪客只需跟隨活動小冊子遊覽上述六幅梵高原畫，了解其背後故事並完成小冊子上嘅任務，就可以獲得展覽限定嘅「比卡超自畫像」卡牌一場，數量有限。另外美術館亦會推出一系列相關週邊，例如個「比卡超自畫像」Tote Bag就相當吸引。

值得留意嘅係，目前無論展覽、特別卡定啲週邊，都只係荷蘭梵高美術館限定，未有公佈會移師到其他國家舉行，所以如果各位《Pokemon》迷真係想入手，可能真係要親自去一次荷蘭啦。

資金來源：梵高美術館、Pokemon