《Kick-Ass》及《Kingsman》系列導演Matthew Vaughn日前於紐約動漫展(NYCC)上，向影迷大談電影製作經歷，並透露籌備多年嘅重啟版《Kick-Ass》及《Kingsman 3》將於明年正式開拍。

Matthew Vaughn表示，重啟版《Kick-Ass》將會以全新角色取代原有角色，風格亦會同原版截然不同：「下年我哋將會重啟《Kick-Ass》以及推出《Kingsman 3》...當年《Kick-Ass》改變咗大家對超級英雄電影嘅諗法，所以我哋想再嚟多一次，不過今次重啟版就唔會用返原版《Kick-Ass》任何角色，但我哋好樂意喺重啟之後帶佢哋回歸。重啟版故事走向將與原版截然不同，目前唔方便透露太多，但我保證會非常有趣。」另外，佢仲話重啟版《Kick-Ass》將會非常瘋狂，以至佢有機會面臨法律訴訟。

改編自Mark Millar同名漫畫嘅另類英雄電影《Kick-Ass》於2010年上映，憑住搞笑騎呢又熱血暴力嘅風格深受影迷歡迎，以3,000萬美元成本斬獲9,600萬美元票房。可惜2013年推出嘅續集《Kick-Ass 2》並非由Matthew Vaughn繼續執導，成績及評價不如預期，導致第3集遲遲都未有著落，如今Matthew Vaughn親自操刀推出重啟版，確實令人期待。