近日Nicolas Cage因宣傳A24新作《Dream Scenario (大叔夢中人)》而接受多間傳媒訪問，其中佢接受《UPROXX》訪問時，卻出乎意料地預告會「電影引退」，未來希望可以向電視劇集方面發展。

《Dream Scenario》劇照

圖片：A24

話說於《UPROXX》嘅訪問中，記者Mike Ryan先係問到《Dream Scenario》中Nicolas Cage嘅演出，與過往大家印象中嘅佢有所不同，而Nicolas Cage就回答到：「我鍾意保持新鮮感…我唔希望困喺同一種作品類型或者某個演出風格，我希望咩都做。而去到呢一刻——拍咗45年戲、超過100部作品後——我覺得已經講哂所有我想對電影講嘅嘢，我希望可以於高峰中離開，講聲Adios (西班牙文嘅再見)。」

Nicolas Cage隨後表示，其實佢本來希望拍完《Dream Scenario》就告別電影，只係因為佢仲有其他片約要履行，所以最終應該會再拍多3至4部電影先正式告別。

《The Unbearable Weight of Massive Talent》劇照

圖片：IMDB

至於未來發展，Nicolas Cage就表示自己對「沉浸式串流以及電視劇集」非常感興趣。「我依家睇到當你畀足夠時間一個角色後，佢可以做啲咩。我睇住Bryan Cranston喺某集《Breaking Bad》中望住個行李箱成個鐘，電影中唔會有呢個時間，所以電視可能就係我嘅下一步。」

同時佢亦提到改拍電視劇嘅原因，與其父親於75歲離世有關。「我下個月就60歲，而我父親係75歲離世。如果我好彩，我可能會剩返多過15年嘅時間，但呢啲嘢話唔埋架嘛，咁呢15年我應該用黎做咩？有咩係重要嘅？重要嘅就係我嘅小朋友，仲有個BB女。如果我可以搵到部喺同一個地方拍攝、唔使飛黎飛去嘅劇集，咁我同屋企人就可以一齊。對我個人而言，係一件非常好嘅事。同時，作為一個學生，我肯定仲可以從電影身上學到啲咩，但我有可能於電視劇上學到新嘅嘢。」

資料來源：UPROXX