第96屆奧斯卡金像獎日前公布入圍名單，去年票房冠軍《Barbie》雖獲8項提名，但因導演Greta Gerwig及Margot Robbie未能入圍「最佳導演」及「最佳女主角」引起網民熱議，於劇中飾演Ken嘅Ryan Gosling就替兩人感到可惜，發文表示失望。

由Margot Robbie及Ryan Gosling主演嘅《Barbie》於去年夏天掀起一陣粉紅熱潮，全球大收14.4億美元房票，榮登2023年最賣座電影，並獲奧斯卡「最佳電影」、「最佳男配角」、「最佳女配角」、「最佳改編劇本」、「最佳美術設計」、「最佳服裝設計」以及兩首「最佳原創歌曲」共8項提名，但因無緣「最佳導演」及「最佳女主角」引起網民熱烈討論。對此，各大影星及名人亦紛紛發表個人看法。

憑飾演Ken獲得「最佳男配角」提名嘅Ryan Gosling表示：「喺有咁多精彩電影嘅一年入面，我非常榮幸能夠同各位優秀演員一齊被提名。我非常榮幸及自豪能夠扮演名為Ken嘅塑膠公仔，但冇Barbie就冇Ken，而且冇Greta Gerwig同Margot Robbie就冇《Barbie》，佢哋兩個係呢部創造歷史且享譽全球電影嘅最大功臣。如果話對佢哋未獲提名而感到失望，實在太輕描淡寫，佢哋克服重重困難，單憑幾個穿著衣服嘅公仔就能夠令我哋開懷大笑、感到心碎，並推動文化發展及創造歷史，理應要同其他當之無愧嘅提名者一同獲得認可。」

Being involved in a small way gave me a window into just how hard Greta and Margot had to fight to get Barbie made, and how flawlessly they executed. Together they started a movement, touched the world and reinvigorated the cinema.

They deserve everything. They ARE everything.

— Simu Liu (@SimuLiu) January 24, 2024

同樣於劇中飾演Ken嘅劉思慕亦發文表示：「在電影中飾演一個小角色，令我有機會見識到Greta Gerwig同Margot Robbie為《Barbie》付出多大努力，以及兩人如何完美地拍出呢部電影。佢哋共同發起一場運動，感動了全世界以及重振影壇。佢哋值得擁有一切，佢哋就係一切。」

而上屆奧斯卡金像影后楊紫瓊亦於美國早晨節目《Today》被問及此事，楊紫瓊一方面為《Barbie》獲得多項提名感到開心，另一方面亦為Margot Robbie無緣角逐影后感到失望：「獎項競爭非常激烈，而且冇任何保證能夠入圍，因為你唔係唯一嘅選民。呢種事情好普遍，但幸好呢部電影有被提名最佳影片，但你確實會諗『既然都獲得最佳影片提名，但點解冇提名最佳導演同最佳女主角呢？』」

第96屆奧斯卡金像獎將於香港時間3月11日早上7點舉行，唔知今年各獎項究竟會花落誰家呢？