去年10月舉行嘅紐約動漫展中，東映宣佈為慶祝《龍珠》40週年而推出新動畫《龍珠DAIMA》，並於今年秋天播放。而近日東映亦再釋出以悟空為主角嘅預告，從中可以見到新動畫似乎回歸原作早期嘅冒險故事風格，完全冇任何誇張戰鬥畫面，甚至仲有些少成龍電影感覺？

去年公佈《龍珠DAIMA》時，作者鳥山明亦有發文，佢表示「DAIMA」一詞為漢字「大魔」嘅意思，而《龍珠DAIMA》嘅故事發生於《龍珠Z》之後、《龍珠超》之前，並由佢本人負責故事及大部份設定。故事將講述悟空及一眾伙伴亦遭到暗算而變回小孩，並為咗解決問題而前往未知嘅宇宙展開冒險。

雖然個設定就好似目前已經進入黑歷史，大家都唔提、唔講嘅《龍珠GT》，但從去年公佈嘅預告，以及最新公佈嘅悟空角色預告中，都可以見到悟空用如意棒以及拳腳功夫戰鬥，唔好講變超級撒亞人，就連氣功波都見唔到一個，甚至連舞空術都見唔到，似乎代表悟空等人嘅能力亦會被限制，同時亦令故事充滿《龍珠》早期嘅冒險感。

《龍珠DAIMA》預計於今年秋天播放。