由日本設計師「安田裕紀」於1994年創立嘅品牌「CUNE」，一直都以大膽、強烈到有啲無厘頭嘅風格而深受Fans喜愛。例如早年佢哋曾經推出以「被馬於不同地型拖行不同距離的衣物」為主題，推出一系列佈滿泥濘又爛溶溶嘅服裝；又曾試過用一部有黑猩猩手臂嘅座地影印機做「模特兒」。近日佢哋就與著名動漫《蠟筆小新》合作，推出一系列聯乘服裝，而個結果就係……好多個廣志！

今次聯乘，其實屬於品牌30週年紀念系列嘅一部份。一共推出5款服裝，當中除咗兩件相對平凡嘅黑色外套及T恤之外，另外三件都充滿住惡搞嘅味道。例如其中一件女裝背心長裙就直接印咗廣志個身體上去，著上身之後就有「你個頭，廣志身」嘅奇妙效果。

至於另一件Oversize恤衫外套，就簡單粗暴地於身前左右，以及左右手袖上印上四個廣志全身，正面睇係廣志正面，背面睇係廣志背面。

第三件外套，就用上密麻麻嘅不同表情廣志頭像，再以品牌兔仔Logo作點綴。

由於廣志於日本網絡一向都頗有人氣，再加上今次CUNE嘅設計有趣得黎又有啲荒謬，所以設計公開後就引起網民熱烈討論。如果大家都係廣志Fans嘅話，或者都可以考慮下入手。

資料來源：CUNE