Get Up！Get Up! Get Up! 精兵都好勝！呢首由鄭嘉穎演唱嘅《Keroro軍曹》動畫主題曲，相信大家細個時都聽過好多次。事實上《Keroro軍曹》嘅動畫自2004年4月3日於日本東京電視台首播，至今正好20年時間。而近日官方亦宣佈為紀念20週年而推出續作，不過由於預告公開日期揀喺4月1日愚人節，所以Fans們目前都係「期待卻又怕受傷害」。

官方X上嘅海報

圖片：https://twitter.com/keroro_anime

《Keroro軍曹》漫畫原作由「吉崎観音」創作於1999年起於《月刊少年Ace》上一直連載至今；而動畫就由2004年起於東京電視台首播，一路播到2011年，隨後曾於2014年漫畫原作15週年時，於Animax播出嘅「Keroro Hour」中製作新動畫短片。換言之無論點樣計，「Keroro軍曹」都有成十年冇新動畫推出。

而日前舉行嘅日本動漫節「AnimeJapan 2024」中，官方就突然發佈動畫20週年新情報，以及開設咗「Keroro軍曹」動畫嘅官方X（Twitter）。由於官方X中第一個帖文就發佈咗寫住「作戰繼續中」嘅新海報，加上官方YouTube亦有新PV嘅預定直播。所以Fans們都估計會有新動畫播放。

不過有趣嘅係，由於官方目前用字含糊，加上好揀唔揀，揀咗喺4月1日愚人節進行直播，所以Fans目前都係將信將疑。或者要等到4月1日新PV公開，大家先會知道係咩葫蘆賣咩藥啦。