相信大家細個都玩過Game Boy或者有彩色螢幕嘅Game Boy Color(GBC)，但你又記唔記部機有幾大呢？雖然講唔出具體尺寸，但我諗大部份人心目中都認為GBC比現時嘅智能電話大部。然而，最近有日本漫畫家就貼出一張對比圖，令網民驚覺原來GBC同iPhone差唔多大，引起熱烈討論。

（圖片截自：X）

日本漫畫家「たなかあひる」日前於X上表示，佢早排拎起20多年前嘅Game Boy Color時，發現機身尺寸原來同佢目前用緊嘅iPhone 12差唔多，令佢感到相當驚訝，事關喺佢嘅印象入面，Game Boy Color至少比iPhone 12大一個碼，點知實情原來相差無幾，iPhone 12甚至更長。

唔少網民都表示認同，並紛紛貼出PSP、GBA、GBC與iPhone嘅實機對比照，同時驚嘆自己當年原來係用咁細個螢幕打機，難怪會導致近視，其中有網民就指出因為大家當時年紀尚小，手比較細，所以先會有Game Boy係好大部嘅印象。唔知大家印象中又係咪覺得Game Boy大部過智能電話呢？

資料來源：togetter.com