無論談論嘅對象是男是女，只要提到「性感」二字，大家第一時間都會諗起「身材外貌」。不過近日一個英國調查就可能——再一次——顛覆大家對「性感」嘅定義，事關有個大肚腩加頭髮越見稀疏嘅主持人Jeremy Clarkson，竟然擊敗Tom Holland、威廉王子、英格蘭國家隊教練Southgate等人，連續兩年被英國民眾選為最性感嘅男人！

是次調查由號稱「英國第一已婚人士約會網站」嘅「IllicitEncounters」舉行，佢哋搵黎2,000名英國女性會員，並要求佢哋於50個「過去一年最有名」嘅英國男名人當中，選出各自心中嘅十大性感名單，其中排第一嘅名人有10分、第二名有9分等如此類推。主辦方收集所有問卷後就拉個平均出黎。結果現年64歲，前《Top Gear》、現Amazon Prime《The Grand Tour》、《Clarkson's Farm》主持人Jeremy Clarkson嘅平均分高達九分，唔單止繼上年再次成為冠軍，仲打破埋佢去年嘅8分紀錄。

而緊隨其後嘅就有《Spider-Man》男星Tom Holland、英國皇儲威廉王子，以及「三獅兵團」教頭Southgate。《Oppenheimer》男星排名第五，但就因為佢其實係愛爾蘭藉而被剔出榜外。其餘頭10人士包括演員Idris Elba、喜劇演員Romesh Ranganathan、另一個演員Sam Thompson、早前完成從非洲最南端跑到最北端嘅運動員Russ Cook、以及晨間節目主持Dermot O'Leary。

至於點解Jeremy Clarkson又老、又大肚腩、又禿頭、仲要得罪人多稱呼人少，都可以成為「最性感男人呢」？「IllicitEncounters」發言人接受訪問時表示：「Clarkson同佢個農場，就有啲似挪亞同佢條方舟。而正如方舟上嘅動物，Clarkson成為最性感男人嘅男人亦有兩個。我哋知道佢通常都非常魯莽，但從Diddly Squat（佢個農場名）中我哋見到佢亦可以扣動別人心弦，而且明顯地佢嘅農夫打扮繼續令人心如鹿撞。」

上兩個禮拜先播出第三季嘅《Clarkson's Farm》紀錄住喺倫敦「文明社會」嘅Clarkson有日決定到英國鄉下做一個現代化農夫，並於多名員工幫忙下管理好「Diddly Squat」嘅過程。當中Clarkson嘅魯莽及忽發奇想固然令節目增加不少笑料，但經營農場、睇天食飯、與當地議會周旋等情節亦揭示出英國農夫面對嘅困境。Clarkson嘅表現亦比過去其他節目更自然、真誠。或者就係節目播出後佢形象大有改善嘅原因之一。

資料來源：Mirror