由日本漫畫家鈴木祐斗創作、自2020年於《週刊少年Jump》開始連載嘅搞笑人氣漫畫《坂本DAYS》（SAKAMOTO DAYS）宣布推出電視動畫，並同步公開首部PV片段及視覺圖。Btw：主角坂本太郎只係發咗福嘅前殺手，唔係安西教練嚟！

《坂本DAYS》講述主角「坂本太郎」本來係一位令人聞風色變、備受同行敬仰嘅超強殺手，但後來同一位便利店女店員墮入愛河後就金盤洗手，辭去殺手工作結婚、生兒育女、發福，變成一個普通爸爸。然而，昔日拍檔突然搵上門，並透露殺手界有人重金懸賞佢嘅人頭，平靜生活從此一去不返，為咗保護家人，坂本只好重操舊業抵抗各個勢力來襲。

動畫版《坂本DAYS》將由《 Dr.STONE》製作公司TMS Entertainment操刀，渡邊正樹擔任監督，《銀魂》（坂田銀時）聲優杉田智和將聲演主角「坂本太郎」。