由Ubisoft開發嘅著名遊戲系列《Assassin's Creed》新作《Assassin's Creed: Shadows》，因用上黑人角色「彌助」做主角之一，而且強調彌助為「武士」而引起日本玩家抗議。近日Ubisoft終於正面回應事件，強調所有《Assassin's Creed》遊戲均不以「真實反映歷史」為目的，而係從歷史「啟發」而成，同時亦就引起日本玩家「擔憂」而致歉。

Ubisoft日前於《Assassin's Creed》嘅美國及日本官方X（Twitter）分別放上長達4頁、以英文及日文寫成嘅公告。公告首先感謝日本玩家過去對《Assassin's Creed》系列嘅支持，並指出能夠以封建日本為背景創作遊戲係佢哋期待已久嘅夢想。隨即點出自《Assassin's Creed: Shadows》公開宣傳後，就收到「好多正面反應」及「部份，包括來自日本玩家的批評。」Ubisoft指雖然佢哋致力於遊戲中製作一個「有沉浸感及可信的封建日本」，但「我們從來沒打算把遊戲當成真實反映歷史或歷史人物的作品」，「《Assassin's Creed Shadows》從設計之初就是以可信但虛構的封建日本為背景的娛樂性遊戲。」

不過Ubisoft亦就承認「宣傳物料中的某些元素，令日本玩家產生擔憂」，並為此致歉。另外公告亦強調，雖然佢哋的確搵過唔少外部顧問協助製作遊戲，但「他們絕不應為遊戲創作團隊的選擇之負上責任」。公告嘅後段表示佢哋知道「彌助」嘅武士身份「亦有待討論」，而且遊戲另一名日本人主角「藤林奈緒江」於遊戲中亦一樣重要。佢哋期待11月遊戲發佈後仍能得到日本玩家支持。

必須一提嘅係，日本玩家之所以對「彌助」呢個角色感到不滿，並非因為「日本出現黑人」。事實上日本玩家以及歷史愛好者並不否定「彌助」曾經存在於戰國時期嘅日本，佢哋感到不滿嘅係遊戲為「彌助」冠上「武士」銜頭偏離歷史。例如有網民指出「彌助」連姓都無，絕對唔會屬於武士階層。

事件嘅另一「支線」，係Ubisoft製作遊戲時參考咗曾於日本大學法學系授課嘅Thomas Lockley所著嘅《傳奇黑人武士彌助》（African Samurai：The True Story of Yasuke, a Legendary Black Warrior in Feudal Japan）一書。但Thomas Lockley沒有任何修讀、研究歷史嘅背景，後來亦被人發現佢過去10年多次修改「彌助」嘅日文及英文維基頁面，然後書中引用維基百科、維基百科又反過來引用自己本書，換言之「彌助」嘅大部故事都可能為其創作嘅「偽史」。