由Joaquin Phoenix主演嘅2019年電影《Joker》叫好叫座，亦催生出即將於10月上映、有Lady Gaga加入飾演「小丑女」Harley Quinn嘅續集《Joker：Folie à Deux》（以下簡稱《Joker 2》）。由於《Joker 2》將會以音樂劇形式呈現，換言之Joaquin Phoenix要於拎過N個格林美獎項嘅Lady Gaga面前唱歌。近日佢接受訪問時，就提到Lady Gaga第一次聽到佢開口唱歌時「連咖啡都噴埋出黎」。

Joaquin Phoenix近日接受美國《Empire》雜誌訪問，並於當中提到要於Lady Gaga面前唱歌一事，並打趣地說：「我記得我第一次開口唱歌時，Lady Gaga好似噴連咖啡都噴埋出黎。所以我感覺非常『好』，令我非常興奮而且充滿信心。」但佢隨後就表示Lady Gaga於整個拍攝過程中都一直鼓勵佢放鬆唱歌：「Gage永遠都非常有鼓勵性，『順住個感覺去就得㗎啦，冇問題㗎！』對於一個從來冇做過呢類型表演嘅人黎講…雖然都係非常不安，但同時亦非常刺激。」

Joaquin Phoenix表示，《Joker 2》之所以會用音樂劇形式呈現，係因為音樂對Arthur Fleck（其戲中角色）非常重要，導演Todd Philips亦曾經表示「有音樂在Arthur裏面」。Joaquin亦指出佢於演出冇追求完美地唱歌：「Arthur係聽住佢媽媽播嘅電台歌曲長大，佢唔係一個歌手，所以亦唔應該唱得似一個專業歌手。佢應該似係一個沖沖下涼然後自己唱歌嘅人。」

資料來源：Empire