由Ryan Reynolds及Hugh Jackman主演嘅《死侍與狼人》叫好又叫座，大量彩蛋及客串引起熱烈討論，更吸引唔少忠實影迷紛紛二刷，截至目前全球票房已達8.24億美元，成為今年第二賣座電影，僅次於《玩轉腦朋友2》(15.55億美元)，業界預計未來幾天將正式衝破10億大關。

*注意：以下內容含劇透*

《死侍與狼人》自上月26日開畫後大受歡迎，相繼創下「史上最佳R級片開畫成績」、「北美影史最佳開畫票房第6位」、「北美影史7月份最佳開畫票房」等紀錄。而於劇中回歸飾演Blade嘅Wesley Snipes更打破兩項健力士世界紀錄，超越「狼人」Hugh Jackman及「X教授」Patrick Stewart，成為扮演Marvel角色最耐嘅演員，以及創下Marvel電影中角色出場間隔最長紀錄(相隔25年340日)。順帶一提，隨住《死侍與狼人》成功，迪士尼影業亦正式成為今年第一間收入突破30億美元嘅電影公司。

嚟緊下半年度將會有《Joker: Folie a Deux》(10月4日)、《Venom: The Last Dance》(10月25日)、《Gladiator 2》(11月22日)、《Mufasa: The Lion King》(12月20日)等商業大片上映，唔知《死侍與狼人》到時可唔可以保住2024年最賣座電影第二位呢？