Sony開發緊性能更進一步嘅PS5 Pro其實唔係咩新聞，早於3月時我哋都曾經為大家整理過PS5 Pro嘅規格及發售日期。不過據外媒報導，原定「年尾」上市嘅PS5 Pro有望稍為提早，9月就發佈，11月就已經有得買。

據來自《Giant Bomb》嘅美國遊戲記者Jeff Grubb於其主持嘅YouTube節目中表示，PS5 Pro於剛過去嘅科隆遊戲展（Gamescon 2024）已經變成「公開嘅秘密」，即係Sony連發佈會都未搞，但所有人都知會即將推出，而且大大小小嘅遊戲開發商都已經收到開發軟件。Jeff Grubb亦表示佢估計Sony會於9月尾舉行嘅「State of Play」發佈會上公佈PS5 Pro，11月就會正式有得賣。

至於PS5 Pro嘅機能提升方面，基本上就同3月時流出嘅傳聞一模一樣。據當時流出嘅規格文件，PS5 Pro會搭載更強大GPU及更快嘅記憶體，圖像渲染速度將提升45%，而光線追蹤效能亦將提升2-3倍，特定情況下甚至可達4倍。另外，Sony將引入一項名為「PlayStation Spectral Super Resolution（PSSR）」嘅機器學習技術，類似NVIDIA DLSS 或AMD FSR，能夠透過提升影像畫質及解析度。