或者係《EVA》Fans非常鍾意買聯乘手錶嘅關係，《EVA》旗下服裝品牌Radio Eva過去曾多次與Citizen等腕錶品牌合作推出產品，近日更再與日本古董手錶品牌Vague Watch Co.合作推出新嘅聯乘腕錶「EVANGELION 13 GMT WATCH β/13号機モデル」。

顧名思義，「EVANGELION 13 GMT WATCH β/13号機モデル」就係以新劇場版中出現嘅「13號機為主題」，腕錶輪廓大致與Vague Watch Co.推出嘅Diver's Son有幾分相似，但錶圈設計稍有不同，機芯亦改用瑞士製石英機芯以獲得GMT功能。另外錶殼及錶帶改用非常有型嘅黑鋼，標有GMT時標嘅錶圈則用上半黑半紫設計。最為特別嘅設計，大概就係錶面嘅秒針以及GMT時針（配合錶圈就可以知道異地時間）都變成「朗基努斯之槍」嘅造型，以呼應劇場版中真嗣與渚薰嘅劇情。

「EVANGELION 13 GMT WATCH β/13号機モデル」官方售價為57,200Yen，即約HK$3,060左右。值得留意嘅係今次聯乘限量100隻，每隻錶嘅底蓋都有鑄刻編碼，對《EVA》Fans黎講應該別有紀念價值啦。

資料來源：EVA Store