去年SNK宣佈會於明年4月24日推出著名格鬥遊戲系列《餓狼傳說》嘅正統續作《餓狼傳說 City of the Wolves》，亦係系列事隔26年黎嘅首款續作，令系列支持者非常驚喜。但黎緊或者會有一件令所有人都驚喜嘅事，就係著名球星C朗拿度似乎有機會出現於遊戲內！

話說C朗嘅各大社交平台，日前都不約而同地發佈一條特別版《餓狼傳說 City of the Wolves》預告。預告由球場上空開始，然後見到主看台比分版上顯示出一個紅底白字嘅「7」，接下來有「A Legendary player joins a legendary game（一個傳奇的球員/玩家加入一個傳奇的遊戲）」以及「CR7」、「Cristiano Ronaldo」字樣。最後鏡頭隨球員通道去到一度寫有《餓狼傳說 City of the Wolves》嘅鐵門之前，鐵門後就有不知名人物/生物欲破門之出。

而帖文中C朗就寫到：「Something exciting is in the making（正在製作某些令人興奮的東西），並標記SNK、餓狼傳說（Fatal Fury）及佢CR7。

從以上可見，C朗肯定會同SNK、《餓狼傳說 City of the Wolves》有某種合作，但不論係帖文內容定條片都無透露合作內容係咩，亦唔肯定所謂嘅「傳奇球員/玩家」究竟係用咩形式「加入」遊戲。如果C朗真係作為可玩角色出現於《餓狼傳說 City of the Wolves》之中，一定會引起極大話題並帶動銷量，但SNK似乎又唔太出得起呢個錢。一切還待雙方進一步公佈詳情。