日本小學生用嘅皮革書包雖然又貴又重，但具代表性之餘其實非常耐用，仲可以展現日本皮革工匠們多年累積嘅手藝，某程度上已經脫離普通嘅書包。而日前日本「年度皮革賞」中，就出現一個一定係藝術品級別嘅小學生書包，事關呢個書包以日本武士鎧為靈感設計，非常有型之餘，售價據報更高達50萬Yen（約HK$2.54萬）。我諗冇小學生會真係揹佢返學吧？

話說日本皮革產業聯合會每年都會主辦「年度皮革賞」，供一眾皮革工匠提供作品參賽，並於10月下旬到11月初公佈所有獎項。其中由村瀬鞄行株式會社工匠「岡田 憲樹」製作嘅「赤色小札黄銅鋲背嚢具足」，就獲得「藝術設計賞」。據作品簡介指出，「岡田 憲樹」因為見到公司製作普通書包時剩返好多邊角料，唔想浪費之下就決定用佢哋黎創作參賽作品，結果拼下拼下就發現睇落好似日本武士嘅鎧甲，於是就製作咗呢個以武士鎧為靈感嘅書包。

評審就指出「岡田 憲樹」嘅作品既有環保精神，亦承載父母對孩子能夠如武士般強壯勇敢嘅寄望，美觀之餘亦兼顧輕巧實用，所以獲頒藝術設計賞。

如果你都想擁有呢個「赤色小札黄銅鋲背嚢具足」，目前村瀬鞄行開放大眾預訂，售價為50萬Yen，而且要製作時間長達半年。另外產品頁面亦講到明呢個書包係觀賞性產品，有好多未必適合小孩返學使用嘅設計細節，就算成人打算自己使用亦要小心。好就好在佢哋提供6年保養，夠讀哂成個小學啦。

資料來源：Japan Leather Award、村瀬鞄行