相信對探險史感興趣嘅朋友，都會聽過著名南極冒險船「堅忍號 (Endurance)」嘅傳奇故事，最近LEGO Icons系列就透過磚塊忠實重現呢艘經典三桅帆船，向人類遠航歷史致敬。

在1914年，著名探險家薛克頓爵士(Sir Ernest Shackleton)為達成人類首次橫越南極大陸壯舉，買下一艘名為「北極星」(Polaris) 嘅三桅帆船，並以家族座右銘重新命名為「堅忍號」(Endurance)，全體船員28人前往未知嘅冰天雪地進發。

然而，船隻到達南極海域後被浮冰重重圍困，薛克頓爵士一行人被迫棄船在浮冰上紮營，飄流10個月後堅忍號最終沉入海底，而薛克頓爵士亦困在浮冰上長達5個月。隨住浮冰逐漸溶解，薛克頓爵士帶領船員登上嚟自堅忍號嘅救生艇，經歷七日七夜到達荒無人煙、遠離任何航線嘅象島(Elephant Island)。為尋找一線生機，薛克頓爵士其後聯同5名最強壯嘅船員，再用16日在天氣惡劣嘅汪洋大海上橫渡1300公里，成功登上南佐治亞島尋求救援，最終成功獲救並將所有船員都帶回了英國。

事隔100多年，現代考察勘探團隊亦在2022年搵到堅忍號嘅殘骸，船身非常完整，船尾「Endurance」字樣仍清晰可見。國家地理頻頻仲專程拍咗套特輯，有興趣嘅朋友可以去了解更多。

回到模型，LEGO今次以3011件零件忠實重現呢艘經典三桅帆船，完成組裝後長達80cm、高47cm。而且細節相當豐富，多層甲板由樓梯連接，具有可拆卸嘅區塊，拆下後可以見到左舷與右舷船艙以及蒸汽，而船舵亦真係可以操縱及轉向。配上隨盒附送嘅展示架及名牌，非常適合航海愛好者裝飾屋企或辦公室。

「LEGO 10335 The Endurance」預計在2024年11月29日正式發售，建議售價為269.99美金（約HK$2,098）。