隨住遊戲直播及攻略影片興起，愈來愈多機迷都鍾意睇打機片，甚至Game都唔買直接睇人玩就算。最近有項調查指出，現時玩家花在睇打機片嘅時間，已經比親身玩遊戲嘅時間更長。唔知大家又係咪睇人打機過多自己打呢？

市場調查機構「MIDiA Research」收集了美國、英國、澳洲、加拿大、德國、法國、瑞典、韓國及巴西等9個地區玩家數據，統計出玩家們打機及觀看遊戲相關影片所花費嘅時間。結果顯示，玩家每周平均花費8.5小時睇打機片，但實際打機時間只有7.4小時。而且，有24%主機/PC玩家，以及48%會經常課金嘅玩家，每月至少都會睇一次打機片，某程度上反映出願意消費嘅玩家都有睇打機片嘅習慣。

全球知名實況主「Ninja」每月收入高達14萬美元（資料來源：dailymail）

對此，MIDiA認為遊戲發行商正錯過一個龐大商機，事關現時好多願意消費嘅玩家都會去YouTube、TikTok或Twitch等第三方平台睇打機片，甚至會課金支持相關直播主及內容創作者。因此，MIDiA建議發行商應設法將玩家帶回遊戲入面，例如自製或與創作者合作，推出獨家遊戲影片，再放喺遊戲內建嘅播放器播出，然後再賣廣告，開拓更多收入來源。

隨住遊戲開發商及發行商收入不斷下降，各大公司紛紛裁員，MIDiA嘅建議從商業角度嚟講未嘗唔係一條出路，但我諗玩家們應該唔會想見到遊戲入面無啦啦多咗個播放器，而且仲要睇睇下片會賣廣告...