自2017年起成為Sony影業CEO嘅Tony Vinciquerra，將於2025年1月2日正式離職。而近日佢接受《Los Angeles Times》訪問時，就回顧咗過去7年嘅工作成果及感想，當中更談到與佢任期基本完全重疊、成續「彪炳」嘅「Sony蜘蛛俠宇宙」，指當中嘅《Madame Web》及新上映嘅《Kraven The Hunter》等其實都係「好電影」，只係媒體「唔知點解不停唱衰」累事…喎！

訪問中Tony Vinciquerra先係談到當年上任後嘅首要任務、如何應對中途發生嘅荷里活大罷工等事，隨後就被問到會點樣評價自己任期內嘅Sony影業成績。對此，Tony Vinciquerra先係強調「我哋大部份成績都非常、非常好」，隨後就提到新上映嘅《Kraven The Hunter》開畫成績大概係佢任內最差，而佢「到依家都唔明白點解，因為電影其實唔差。」

但佢指出自己過去7年半任期內，那怕經歷疫情及罷工，每年都能夠完成財政目標。當中仲有幾年係全公司都拎爆Bonus，所以整體而言成績係非常好。

既然佢自己提起「Sony蜘蛛俠宇宙」，記者當然就唔會放過，於是就進一步追問有關《Kraven The Hunter》及《Madame Web》呢兩部今年上映，同樣口碑票房雙爆死嘅電影。Tony Vinciquerra就指出，「《Madame Web》票房唔好係因為媒體將佢釘上十宇架。套戲其實唔差架，喺Netflix表現仲幾好添！但因為某啲原因，媒體決定唔畀我哋繼續拍《Kraven》及《Madame Web》呢啲戲」、「媒體其實都試過對《Venom》做同樣嘅事，但觀眾鍾意《Venom》，令電影票房大賣。呢啲都唔係爛片，佢哋只係唔知點解被媒體摧毀咗咋！」

而當記者再追問：「你認為成個《蜘蛛俠》宇宙策略係咪要重新諗過？」嘅時候，Tony Vinciquerra再一次將責任推落媒體到：「我覺得要重新諗過，因為佢已經被『蛇咬』（Snakebitten，「注定會不幸」），再拍落去，無論套戲是好是壞，都只會再次被摧毀。」

所以，簡單黎講！原來過去幾年嘅「Sony蜘蛛俠宇宙」係充滿好電影，一日最衰都係啲媒體唱衰佢哋，我哋又被媒體教唆所以票房先唔好！依家成個宇宙玩完唔係Sony嘅錯，原來係我哋嘅錯呀！

資料來源：Los Angeles Times