外型忠實還原拓海座駕Toyota AE86，而且嗰轆仲識得郁！既可以當作一般濕紙巾盒，又可以拎上手把玩。

經典賽車動漫《頭文字 D》當中，最為人熟悉嘅車款莫過於拓海嘅AE86，最近日本廠商Camshop就同講談社合作，推出AE86造型濕紙巾盒，以奇趣方式還原經典。據官方介紹，濕紙巾盒主要由ABS、PVC等塑膠製成，尺寸為27cm x 12cm x 8.8cm，忠實還原原作AE86樣貌，包括車身「藤原とうふ店（自家用）」字樣、彈出式頭燈，就連煞車卡鉗亦得以還原。

呢款濕紙巾盒分別有白色及黑色引擎蓋兩種版本可選，相容尺寸不大於14cm x 9.3cm x 7cm嘅濕紙巾，售價為7,700日元（約HK$378），目前已於Camshop網站開放訂購，預計1月下旬發貨。