息影近10年嘅Cameron Diaz最近為宣傳新作《Back in Action（間諜夫妻再出山）》接受外媒Access Hollywood訪問。被問到有冇機會回歸經典喜劇《The Mask（變相怪傑）》，再次扮演夜總會歌手Tina Carlyle時，Cameron Diaz就表示如果Jim Carrey會參演，佢當然願意回歸，仲話自己從Day1開始就係靠Jim Carrey帶挈。事實上，當年寂寂無名嘅Cameron Diaz就係憑藉《The Mask》在21歲就一炮而紅，成為家喻戶曉嘅性感女神。

另一方面，Jim Carrey早前接受comicbook.com訪問時亦表示，如果劇本合適，佢都會考慮回歸《The Mask》續集：「如果有人提出一個好idea，我會考慮一下...不過唔關錢事。雖然我經常講笑係為錢而拍戲，但事實上並唔係咁，未來好多嘢都難以預料。我曾經講過我想退休，但正確啲嚟講應該係『休息一下』，因為當有一個好嘅idea或者有一班能夠合作愉快嘅人出現，一切都變得有可能發生。」

由Jim Carrey主演嘅1994年經典喜劇《The Mask》，講述個性老實而且經常被人嘲笑嘅銀行職員Stanley Ipkiss，意外取得一個神秘面具，戴上瞬間變成了一名滑稽綠面怪人，能夠隨心改變自己與周圍環境，搞出唔少笑料。電影在當年成功以2,300萬美元成本斬獲3.51億美元票房，吸引唔少後來者模仿，就連星爺嘅《百變星君》都有致敬呢部作品。