而家潮流興Reboot、Remake、Remastered（都係炒冷飯啦），遊戲界亦唔例外。繼2018年《鬼武者》高清復刻版後，如今CAPCOM宣布《鬼武者2》亦會推出高畫質復刻版，預計今年內登陸PC、PS4、Xbox及Nintendo Switch等多個平台，各位老玩家又係時候重溫一下經典喇。

2002年PS2遊戲《鬼武者2》為系列第二部作品，由稻船敬二擔大旗開發，故事設定在第一集《鬼武者》13年後，講述明智左馬介打完幻魔王後，織田信長被倖存嘅幻魔族推舉成新一代幻魔王。經過多年養兵蓄銳，信長率領幻魔軍團企圖統一全凡界，同時命令手下血洗柳生莊，以防止鬼族與柳生家族聯盟，阻礙佢完成千秋霸業。玩家在遊戲中扮演半鬼半人血統嘅男主角柳生十兵衛，跟隨母親指引下繼承鬼武者嘅力量，同織田信長展開生死決戰。

除此之外，CAPCOM亦公開鬼武者新作《鬼武者 Way of The Sword》更多情報，透露遊戲將以江戶時代初期嘅京都為舞台，延續舊有劍鬥玩法及暗黑風格之餘，加入全新角色及更多元素。並向玩家大派定心丸，表示本作並非高難度嘅動作遊戲（即係唔係魂類），鍾意動作遊戲嘅玩家都能夠體驗到爽快嘅劍鬥同成就感，預計2026年推出。