任天堂推出嘅Famicom（即大家熟知嘅紅白機）歷史上曾推出過1053款遊戲卡帶，而擁有成套係唔少遊戲收藏家嘅夢想。但早前有位日本收藏家就於二手網站上，販售佢已經收集咗1052隻遊戲嘅整套收藏。明明只差一隻就完成目標，點解要呢個時候放棄？

話說早前於日本二手網站「mercari」上，有一位名叫「ヒゲかつお」嘅用家，以340萬Yen約（HK$17.5萬）出售紅白機上嘅1052款遊戲卡帶、New Famicom主機、類似跳舞氈嘅Fami Trainer控制器，以及部份遊戲嘅攻略本、說明書等。雖然佢講到明，絕大部遊戲都有破損、而且缺少原裝紙套，部份甚至壞咗無法讀取，但單睇個量都知佢一定花咗唔少時間同金錢收集。

更令人在意嘅係，佢於產品介紹中都話1052款遊戲係「比維基百科話總共有1053款遊戲少一款」。所以唔少人都於留言問，差一隻就集齊全套，點解你唔自己儲埋落去，要拎出黎賣呢？

「ヒゲかつお」其他販售物品

PC Engine遊戲

N64遊戲

漫畫《筋肉人》全套

《反斗車王》Tomica系列

而據「ヒゲかつお」嘅回覆，原來佢年紀已經唔細，係「已經睇到生命盡頭」嘅階段。而或者係佢冇屋企人，又或者認為屋企人唔理解收藏品嘅價值，所以佢決定將收藏盡數轉讓予有需要嘅人。事實上如果去睇二手網站上「ヒゲかつお」嘅頁面，會發現佢係「傾家盪產」式咁賣，除咗上述嘅紅白機卡帶之外，仲有大量PC Engine遊戲及N64遊戲、少量GBA、Wii、PS4、Switch遊戲，非常多漫畫、Tomica車仔以至登山用嘅衫褲鞋襪等。從中除咗感受到佢以往嘅喜好與熱情，亦令人有種「萬般帶不走」嘅唏噓感。

資料來源：Mercari