隨住羅素兄弟回歸執導《Avengers》系列，以及Robert Downey Jr.與Chris Evans等元老復仇者換角重返MCU，唔少影迷都憧憬「黑寡婦」Scarlett Johansson亦會歸隊。不過，佢最近就向Fans大潑冷水，直言Natasha已經死咗，只係Fans唔願意接受呢個事實。與此同時，佢亦解釋點解自己從來唔玩社交媒體。

最近Scarlett Johansson接受《InStyle》雜誌專訪，敞開心扉大談事業與家庭，以及對社交媒體嘅睇法。作為少數完全唔用社交平台嘅荷里活名星，Scarlett Johansson表示片商都有叫佢開IG谷戲，但佢依然拒絕加入：「直至今日，我都仲收到環球影業寄嚟嘅email，問我會唔會考慮喺電影上映時開個IG帳號。加入社交媒體真係令我感到好大壓力，我會諗...有咩方法可以令我加入後，同時又能夠繼續做自己呢？但我感覺自己做唔到。我所創作嘅作品全部都係基於真實感，呢樣嘢非常關鍵。如果我本身係好鍾意玩社交媒體嘅人，咁我當然可以加入，但我唔係。而且，我相信就算唔靠IG，呢部電影依然會有好成績。」

至於影迷最關心嘅「黑寡婦會否回歸MCU」，Scarlett Johansson就斬釘截鐵表示：「Natasha已經死咗，佢真係死咗，死得清清楚楚。但班Fans就係唔肯相信，仲話『佢有可能復活呢！』聽住，Natasha已經犧牲咗自己為整個宇宙帶嚟平衡，大家係時候要放手，應該畀佢留住呢個英雄時刻。」

《Jurassic World: Rebirth》由《俠盜一號：星球大戰外傳（Rogue One: A Star Wars Story）》導演Gareth Edwards執導，仲搵嚟《侏羅紀公園》首兩集編劇David Koepp回歸執筆劇本，將於今年7月2日正式上映。

資料來源：variety